શું રાહુલ ગાંધીને ખતરો છે? કોંગ્રેસે ગૃહમંત્રી અમિત શાહને પત્ર લખી કરી સુરક્ષાની માંગ

કોંગ્રેસે રાહુલ ગાંધીની ભારત જોડો યાત્રામાં સુરક્ષામાં ખામી હોવાનો આક્ષેપ કર્યો છે. કોંગ્રેસ મહાસચિવે આ અંગે ગૃહ મંત્રાલયને પત્ર પણ લખ્યો છે. જેમાં તેમણે દિલ્હીમાં ભારત જોડો યાત્રા દરમિયાન રાહુલની સુરક્ષામાં થયેલી ચૂકની વાત કરી છે. કોંગ્રેસનો દાવો છે કે રાહુલની સુરક્ષાના મુદ્દે દિલ્હી પોલીસ સંપૂર્ણપણે નિષ્ફળ રહી છે.

24 ડિસેમ્બરની ઘટના

કોંગ્રેસ પાર્ટીનો આરોપ છે કે જેવી 24 ડિસેમ્બરે યાત્રા દિલ્હી પહોંચી, તે પછી રાહુલ ગાંધીની સુરક્ષામાં ઘણી વખત ભંગ થયો હતો અને દિલ્હી પોલીસ ભીડને નિયંત્રિત કરવામાં અને તેમની આસપાસ સુરક્ષા કોર્ડન જાળવવામાં નિષ્ફળ રહી હતી. રાહુલ ગાંધીને Z પ્લસ સુરક્ષા મળી છે. કેસી વેણુગોપાલે ફરિયાદમાં જણાવ્યું હતું કે આ પછી સ્થિતિ ખૂબ જ ખરાબ થઈ ગઈ. ભારત યાત્રામાં સામેલ કોંગ્રેસના કાર્યકરો અને યાત્રીઓએ સુરક્ષા ઘેરો બનાવવો પડ્યો હતો.

દિલ્હી પોલીસ નિષ્ફળ રહી: કોંગ્રેસ

કેસી વેણુગોપાલે પત્રમાં લખ્યું છે કે, દિલ્હી પોલીસ મૂક પ્રેક્ષક બની રહી અને ભીડને રોકવામાં નિષ્ફળ રહી. આ સિવાય જે લોકો રાહુલ ગાંધીને મળી રહ્યા છે તેમને ડરાવવા માટે ઈન્ટેલિજન્સ બ્યુરોનો ઉપયોગ કરવામાં આવી રહ્યો છે. IB તેમની સતત પૂછપરછ કરી રહી છે.

‘સુરક્ષા પર રાજકારણ ન થવું જોઈએ’

કેસી વેણુગોપાલે યાદ અપાવ્યું કે કલમ 19 હેઠળ, કોઈપણ વ્યક્તિ અભિવ્યક્તિની સ્વતંત્રતા હેઠળ પ્રદર્શન અથવા યાત્રા કરી શકે છે અથવા તેમના વિચારો વ્યક્ત કરી શકે છે. રાજીવ ગાંધી અને ઈન્દિરા ગાંધીની હત્યાનો ઉલ્લેખ કરતા કેસી વેણુગોપાલે કહ્યું કે કોંગ્રેસ પાર્ટીએ તેના બે નેતાઓ ગુમાવ્યા છે અને આવી સ્થિતિમાં તેમની માંગ કરે છે કે રાહુલ ગાંધીની સુરક્ષા સાથે કોઈ રાજકારણ ન કરવું જોઈએ.

જણાવી દઈએ કે ભારત જોડો યાત્રા સપ્ટેમ્બર મહિનામાં તમિલનાડુથી શરુ થઈ હતી અને કાશ્મીરમાં પૂરી થવાની છે.