સમગ્ર ભારતને એકતાંતણે જોડનાર સરદાર વલ્લભભાઈ પટેલ વિશ્વની સૌથી વિરાટ પ્રતિમા સ્ટેચ્યૂ ઓફ યુનિટીના સાનિધ્યમાં સૌરાષ્ટ્ર-તમિલ સંગમ થકી તમિલ અતિથિઓ એકતાનગરના આંગણે પધાર્યા હતા. ત્યારે જિલ્લા કલેક્ટર શ્વેતા તેવતિયા અને સ્ટેચ્યૂ ઓફ યુનિટી ઓથોરિટીના મુખ્ય કારોબારી અધિકારી ઉદિત અગ્રવાલની નિગારનીમાં સ્વાગત આવકાર માટે લાયઝનિંગ અધિકારી દ્વારા સુનિશ્ચિત વ્યવસ્થા ગોઠવવામાં આવી છે. તમિલ બાંધવો એકતાનગર ખાતે સરદાર સાહેબની પ્રતિમાની ભવ્યતા જોઈને મંત્રમુગ્ધ થયા હતા અને SOU પરિસરમાં જ “સરદાર સાથે સેલ્ફી” લઈને ધન્યતા અનુભવી હતી.
સ્ટેચ્યુ ઓફ યુનિટીના પરિસરની અંદર સરદાર વલ્લભભાઈ પટેલની પ્રાસંગીક, ઐતિહાસિક અને સ્ટેચ્યુ ઓફ યુનિટીના નિર્માણ કાર્યની ઝીણવટપૂર્ણ માહિતી તસવીરી પ્રદર્શન દ્વારા નિહાળી હતી. ગાઈડમિત્રોએ તમિલ બાંધવોને સ્ટેચ્યુ ઓફ યુનિટીના નિર્માણકાર્યથી વાકેફ કર્યા હતા. તમિલ પ્રવાસીઓને વ્યુઇંગ ગેલેરી પરથી વિંદ્યાચલ-સાતપુડા ગિરિમાળાના પ્રાકૃતિક સૌંદર્યના અદભુત દર્શન કરાવ્યા હતા.
મૂળ ગુજરાતના સૌરાષ્ટ્રિયન તમિલ અતિથિઓની સરદાર સાહેબની પ્રતિમાના દર્શનનો લાભ સૌરાષ્ટ્ર-તમિલ સંગમ થકી મળ્યો છે. તેનો શ્રેય ભારતના વડાપ્રધાન નરેન્દ્રભાઇ મોદી અને ગુજરાતના મુખ્યમંત્રી ભુપેન્દ્રભાઈ પટેલને જાય છે.
“સૌરાષ્ટ્ર-તમિલ સંગમ” માં બે રાજ્યોની કલા અને સંસ્કૃતિના આદાન-પ્રદાન થાય અને એકતાનો આ સંબંધો વધુ ગાઢ બને તેવા ઉમદા આશય સાથે સ્ટેચ્યુ ઓફ યુનિટીના પટાંગણમાં પધારેલા બાંધવોએ “ભારત માતા કી જય” ના નારા સાથે ખરેખર એકતાની ભાવનાને ઉજાગર કરી હતી. અહીં પધારેલા બાંધવો “એક ભારત, શ્રેષ્ઠ ભારત” નો સંદેશ આપી રહ્યા છે.
સોમનાથ, દ્વારકા બાદ ત્રીજા પડાવમાં એકતાનગરના આંગણે પધારેલી તમિલ અતિથિઓની નવમી બેચનું ટેન્ટસિટી-૦૨ ખાતે નાયબ કલેકટર પ્રોટોકો એન.એફ.વસાવા સહિત સંગઠનના આગેવાનો દ્વારા પુષ્પગુચ્છ અર્પણ કરીને ઉષ્માભેર સ્વાગત કરવામાં આવ્યું હતું.
Advertisement
