દિલ્હી સરકારે રેપિડો (Rapido), ઓલા (Ola) અને ઉબેર (Uber)ની બાઇક સર્વિસ પર પ્રતિબંધ મૂક્યો હતો, જેના પર હવે દિલ્હી હાઈકોર્ટે મોટો નિર્ણય લીધો છે. ફેબ્રુઆરી 2023માં, દિલ્હીની આમ આદમી પાર્ટીની સરકારે ઓલા-ઉબેર અને રેપિડો જેવી કેબ એગ્રીગેટર કંપનીઓની બાઇક સેવા પર પ્રતિબંધ મૂક્યો હતો. સરકારના નિર્ણય સામે કંપનીઓએ દિલ્હી હાઈકોર્ટમાં અરજી કરી હતી. કોર્ટે સરકારના નિર્ણય પર સ્ટે મૂકીને આ કંપનીઓને મોટી રાહત આપી છે. દિલ્હી હાઈકોર્ટે કેબ એગ્રીગેટર કંપનીઓને દિલ્હી ટ્રાન્સપોર્ટ વિભાગની નોટિસ પર સ્ટે આપવાનો આદેશ આપીને રાહત આપી છે.
કોર્ટે સરકારને ફટકાર લગાવતા કહ્યું કે, આ કંપનીઓની સેવા પર આવો પ્રતિબંધ લગાવવો યોગ્ય નથી. હકીકતમાં, દિલ્હી સરકારે ટુ-વ્હીલર બાઇકની સેવા પર પ્રતિબંધ મૂક્યો હતો. સરકારે કહ્યું હતું કે, કંપનીઓ નિયમોનું પાલન કરી રહી નથી. કેબ એગ્રીગેટર કંપનીઓએ આ નિર્ણય સામે હાઈકોર્ટમાં અરજી કરી હતી. કેસની સુનાવણી બાદ કોર્ટે દિલ્હીના ટ્રાન્સપોર્ટ વિભાગને કેબ કંપનીઓ માટે પહેલા પોલિસી બનાવવાનો નિર્દેશ આપ્યો છે, જ્યાં સુધી તે પોલિસી ન બનાવે ત્યાં સુધી તેણે આ કંપનીઓ સામે કોઈ પગલાં લેવા જોઈએ નહીં.
વાસ્તવમાં, ફેબ્રુઆરી 2023માં, દિલ્હી સરકારે રાજ્યમાં બાઇક ટેક્સી સેવા પ્રદાન કરતી કંપનીઓ પર પ્રતિબંધ મૂક્યો હતો. દિલ્હી ટ્રાન્સપોર્ટ ડિપાર્ટમેન્ટે કહ્યું હતું કે, ઓલા-ઉબેરની બાઇક સર્વિસ માટે ખાનગી રજિસ્ટ્રેશન નંબર ધરાવતી બાઇકનો ઉપયોગ કરવામાં આવી રહ્યો છે. ખાનગી નંબરોનો વાણિજ્યિક ઉપયોગ મોટર વાહન અધિનિયમ 1988 વિરુદ્ધ છે. મીડિયા રિપોર્ટ મુજબ, હવે દિલ્હીમાં ઓલા-ઉબેર અને રેપિડો બાઇક સામે કોઈ કડકતા કરવામાં આવશે નહીં. જ્યાં સુધી દિલ્હી સરકાર બાઇક સેવાને લઈને કોઈ નીતિ નહીં બનાવે ત્યાં સુધી તેમને રાહત મળી છે.
