હવે રસ્તા પર ટ્રાફિક પોલીસકર્મીઓના અલગ-અલગ હેલ્મેટ જોઈને નવાઈ પામશો નહીં. જો બધુ બરાબર રહેશે તો અમદાવાદના રસ્તાઓ પરના તમામ ટ્રાફિક પોલીસ કર્મચારીઓ આગામી ઉનાળામાં હેલ્મેટ પહેરીને ટ્રાફિક વ્યવસ્થા સંભાળશે. IPS વિકાસ સહાયને રાજ્યના પોલીસ મહાનિર્દેશક બનાવ્યા બાદ પોલીસકર્મીઓની સુવિધા માટે અનેક પ્રયાસો કરવામાં આવી રહ્યા છે. આ અંતર્ગત અમદાવાદ પોલીસે પાયલોટ પ્રોજેક્ટ તરીકે એસી હેલ્મેટનું ટેસ્ટિંગ શરૂ કર્યું છે. આ અંતર્ગત શહેરમાં ત્રણ અલગ-અલગ જગ્યાએ એક-એક પોલીસકર્મીને એસી હેલ્મેટ આપવામાં આવી છે. જે તેમને ગરમીથી રાહત આપશે. ઉનાળામાં અમદાવાદમાં ગરમીનો પારો 50 ડિગ્રીની નજીક પહોંચી જાય છે. આવી સ્થિતિમાં પોલીસ અધિકારીઓ પ્રયાસ કરી રહ્યા છે કે જો આ એસી હેલ્મેટનો ટેસ્ટ સફળ થાય તો આ હેલ્મેટ ફ્રન્ટ લાઈન પર તૈનાત પોલીસકર્મીઓને આપવામાં આવે.
એસી હેલ્મેટની વિશેષતાઓ
અમદાવાદના ત્રણ પોલીસકર્મીઓને આપવામાં આવેલ એસી હેલ્મેટ ડબલ પ્રોટેક્શન આપશે. આ પોલીસકર્મીઓને પ્રદુષણની સાથે ગરમીથી પણ બચાવશે. તેમાં જે બેટરી છે. તેનું બેકઅપ પણ સારું છે. આગળ એક કાચ છે. જે સૂર્યપ્રકાશ, ધૂળ અને સ્પષ્ટ દ્રષ્ટિ રાખવામાં મદદ કરશે. આ હેલ્મેટની ખાસિયત એ છે કે તેની ઉપર બેટરી ફીટ કરવામાં આવી નથી, બલ્કે આ હેલ્મેટને વાયર દ્વારા બેટરી સાથે જોડવામાં આવશે. આ બેટરી પોલીસકર્મીની કમર પાસે હશે. જેના કારણે પોલીસકર્મીઓને તેમનું કામ કરવામાં કોઈ તકલીફ નહીં પડે અને તેઓને માથે કોઈ બોજ પણ નહીં લાગે. તેમાં એક નાનો પંખો છે જે શરીર પર હવા ફેંકશે. આનાથી પોલીસકર્મીને પરસેવાથી રાહત મળશે અને ગરમી પણ નહીં લાગે.
8 થી 10 કલાકનો બેકઅપ
એસી હેલ્મેટની બેટરી પોલીસકર્મીને ફુલ ચાર્જ થવા પર 8 થી 10 કલાક સુધી ઠંડા રાખશે. જરૂરિયાત મુજબ તેને ચાલુ/બંધ પણ કરી શકાય છે. હેલ્મેટમાંથી નીકળતી હવા 24 થી 25 ડિગ્રીની આસપાસ ઠંડકની હશે. થોડા દિવસો બાદ અમદાવાદ પોલીસ આ ત્રણ પોલીસકર્મીઓના ફીડબેક બાદ આ હેલ્મેટ ખરીદવા અંગે નિર્ણય લેશે, પરંતુ રસ્તા પર અલગ-અલગ હેલ્મેટ પહેરેલા આ પોલીસકર્મીઓની તસવીરો સોશિયલ મીડિયા પર વાયરલ થઈ રહી છે.
