કેન્દ્રીય મંત્રી કૌશલ કિશોરે આ હત્યા માટે માત્ર શિક્ષિત છોકરીઓ અને લિવ-ઇન રિલેશનને જ જવાબદાર ગણાવ્યા છે. તેમના આ નિવેદનની આકરી ટીકા પણ થઈ રહી છે. શિવસેનાના સાંસદ પ્રિયંકા ચતુર્વેદીએ વડા પ્રધાન નરેન્દ્ર મોદીને આ કેન્દ્રીય મંત્રીને કાઢી મૂકવાની માંગ કરી છે
કેન્દ્રીય મંત્રી કૌશલ કિશોરે આ હત્યા માટે માત્ર શિક્ષિત છોકરીઓ અને લિવ-ઇન રિલેશનને જ જવાબદાર ગણાવ્યા છે. તેમના આ નિવેદનની આકરી ટીકા પણ થઈ રહી છે. શિવસેનાના સાંસદ પ્રિયંકા ચતુર્વેદીએ વડા પ્રધાન નરેન્દ્ર મોદીને આ કેન્દ્રીય મંત્રીને કાઢી મૂકવાની માંગ કરી છે.
કેન્દ્રીય મંત્રીએ આપ્યું આવું વિવાદાસ્પદ નિવેદન
કેન્દ્રીય મંત્રી કૌશલ કિશોરે કહ્યું, ‘આ ઘટનાઓ તે તમામ છોકરીઓ સાથે થઈ રહી છે જે સારી રીતે શિક્ષિત છે અને વિચારે છે કે તેઓ ખૂબ સ્પષ્ટવાદી છે અને તેમના ભવિષ્ય વિશે નિર્ણય લેવાની ક્ષમતા ધરાવે છે.’ શ્રદ્ધા મર્ડર કેસનો ઉલ્લેખ કરતા, કૌશલ કિશોરે કહ્યું, ‘તેઓ લિવ-ઇન રિલેશનશીપમાં કેમ રહે છે? જો તેમને આવું કરવું હોય તો લિવ-ઇન રિલેશનશિપ માટે યોગ્ય રજિસ્ટ્રેશન હોવું જોઈએ… જો માતા-પિતા આવા સંબંધો માટે સાર્વજનિક રીતે તૈયાર ન હોય તો તમારે કોર્ટ મેરેજ કરવા જોઈએ અને પછી સાથે રહેવું જોઈએ.’
‘શિક્ષિત છોકરીઓએ આવા સંબંધોમાં ન પડવું જોઈએ’
કેન્દ્રીય મંત્રીએ વધુમાં કહ્યું, ‘છોકરીઓએ એ વાતનું ધ્યાન રાખવું જોઈએ કે તેઓ આવું શા માટે કરી રહી છે… શિક્ષિત છોકરીઓ જવાબદાર છે, કારણ કે પિતા અને માતા બંનેએ સંબંધનો ઇનકાર કરી દીધો હતો. શિક્ષિત છોકરીઓએ આવા સંબંધોમાં ન આવવું જોઈએ.’
પ્રિયંકા ચતુર્વેદીએ કરી કેન્દ્રીય મંત્રીની આકરી
કેન્દ્રીય મંત્રી કૌશલ કિશોરના આ નિવેદનથી વિવાદ ઉભો થઈ ગયો છે. વિપક્ષી સાંસદ પ્રિયંકા ચતુર્વેદીએ આ નિવેદનને મુદ્દો બનાવ્યો અને ટ્વીટ દ્વારા મંત્રીની આકરી ટીકા કરી. શિવસેનાના સાંસદે ટ્વીટ કર્યું, ‘આશ્ચર્યની વાત છે કે તેમણે એવું નથી કહ્યું કે આ દેશમાં જન્મ લેવા માટે છોકરીઓ જવાબદાર છે. બેશરમ, નિર્દય અને ક્રૂર, તમામ સમસ્યાઓ માટે મહિલાઓને દોષી ઠેરવવાની માનસિકતા વિકસી રહી છે.’
અન્ય ટ્વિટમાં, તેમણે કહ્યું, ‘જો @PMOIndia ખરેખર મહિલા શક્તિ વિશે જે કહે છે એનો અર્થ છે તો તેમણે તરત જ આ કેન્દ્રીયમંત્રીની હકાલપટ્ટી કરી દેવી જોઈએ… અમે મહિલાઓ સમાજમાં આવી પિતૃસત્તાક બકવાસનો ભાર ઉઠાવવા માટે પર્યાપ્ત છીએ.’
દિલ્હીમાં શ્રદ્ધા હત્યાકાંડ
ઉલ્લેખનીય છે કે, આફતાબ પૂનાવાલાએ લગ્ન બાબતે ઝઘડો થયા બાદ તેની લિવ-ઇન પાર્ટનર શ્રદ્ધા વોકરની હત્યા કરી નાખી હતી. ત્યારબાદ તેણે લાશને આરીથી કાપીને 35 ટુકડા કર્યા અને દક્ષિણ દિલ્હીના મહરૌલીમાં તેના ઘરે 300 લિટરના ફ્રિજમાં લગભગ ત્રણ અઠવાડિયા સુધી રાખ્યા. બાદમાં આફતાબે રાજધાનીના કેટલાક ભાગોમાં ટુકડાઓનો નિકાલ કર્યો. વોકરના પિતા આંતર-ધાર્મિક સંબંધોની વિરુદ્ધ હતા અને પિતા સાથે ઝઘડો કરીને શ્રદ્ધા આફતાબ સાથે લિવ-ઇનમાં રહેવા ચાલી ગઈ હતી.
