પાકિસ્તાનના એબોટાબાદ શહેરમાં ઘૂસીને આતંકવાદી ઓસામા બિન લાદેનને મારનાર યુએસ નેવી સીલના પૂર્વ કમાન્ડર રોબર્ટ જે ઓ’નીલની અમેરિકન પોલીસે ધરપકડ કરી છે. જે બાદ હોબાળો મચી ગયો હતો. ભૂતપૂર્વ કમાન્ડરની ટેક્સાસ સિટીમાં દારૂ પીને અભદ્ર વર્તનના આરોપમાં ધરપકડ કરવામાં આવી હતી. સ્થાનિક મીડિયાના અહેવાલો અનુસાર, નીલને તેની ધરપકડના કલાકો બાદ જ જામીન મળી ગયા હતા.
મીડિયા અહેવાલ મુજબ, 47 વર્ષીય રોબર્ટ જે ઓ’નીલ સામે બુધવારે ફ્રિસ્કોમાં કેસ નોંધાયા બાદ તેની ધરપકડ કરવામાં આવી હતી. જોકે, નીલને તેની ધરપકડના થોડા કલાકો બાદ જ 2 લાખ 88 હજાર રૂપિયાના બોન્ડ પર છોડી દેવામાં આવ્યો હતો. અહેવાલો અનુસાર, લોન્જમાં હંગામો કરવા બદલ તેની ધરપકડ કરવામાં આવી હતી. હંગામો ત્યારે થયો જ્યારે ભૂતપૂર્વ કમાન્ડર પોડકાસ્ટ રેકોર્ડ કરી રહ્યો હતો.
આ પહેલા પણ પૂર્વ કમાન્ડર વિવાદોમાં રહ્યા છે
મીડિયાના રિપોર્ટ અનુસાર, પૂર્વ કમાન્ડર પહેલા પણ વિવાદોમાં રહ્યો છે. તેના પર જાહેર સ્થળોએ અભદ્ર વર્તન કરવાનો આરોપ છે. વર્ષ 2020માં જ્યારે અમેરિકા મહામારીની ઝપેટમાં હતું ત્યારે પણ તેણે માસ્ક પહેરવાની ના પાડી દીધી હતી. અગાઉ, નીલે 2013માં એક ઈન્ટરવ્યુ દરમિયાન એસ્ક્વાયર મેગેઝિનને કહ્યું હતું કે તેણે મે 2011માં પાકિસ્તાનના એબોટાબાદમાં ઓપરેશન નેપ્ચ્યુન સ્પિયર દરમિયાન બિન લાદેનને મારી નાખ્યો હતો.
લાદેન ઓપરેશનમાં સામેલ હોવાનો દાવો
નોંધપાત્ર રીતે, નીલ પોતાને એ મિશનમાં સામેલ હોવાનો દાવો કર્યો છે જેમાં આંતકવાદી ઓસામા બિન લાદેનને મારવા માટે ઓપરેશન હાથ ધર્યું હતું. પરંતુ હજુ સુધી આ માટે કોઈ નક્કર પુરાવા મળ્યા નથી. તમને જણાવી દઈએ કે અમેરિકી સરકારે ક્યારેય નીલના દાવાને સમર્થન આપ્યું નથી, પરંતુ સરકારે ક્યારેય પૂર્વ કમાન્ડરના દાવાને નકારી કાઢ્યા પણ નથી.
