ગુજરાત વિધાનસભાની ચૂંટણીમાં ભાજપે ઐતિહાસિક જીત મેળવી છે. ગુજરાત વિધાનસભામાં 182 બેઠકોમાંથી ભાજપને 52.5 ટકા વોટ શેર સાથે 156 બેઠકો મળી હતી. ત્યારે ગુજરાતના પૂર્વ મુખ્યમંત્રી અને ભાજપના નેતા વિજય રૂપાણીએ ગુજરાતમાં ભાજપની જંગી જીતનો શ્રેય પીએમ નરેન્દ્ર મોદીને આપતા કહ્યું કે મત મોદીને જતો હોવાનું માનીને લોકોએ મતદાન કર્યું હતું.
શું અન્ય પક્ષોના વિજેતા ધારાસભ્યોને ભાજપમાં સ્થાન મળી શકે છે? આ સવાલ પર વિજય રૂપાણીએ કહ્યું કે શા માટે નહીં. સારા માણસને અહીં સ્થાન મળવું જ જોઈએ. વિજય રૂપાણીએ કહ્યું કે કોઈપણ રાષ્ટ્રીય પક્ષ વોટર ટાઈટ કંપાર્ટમેંટ ન હોઈ શકે. જયારે હું મુખ્યમંત્રી હતો ત્યારે 17 સિટિંગ ધારાસભ્યો કોંગ્રેસ છોડીને ભાજપમાં જોડાયા હતા. તેમણે કહ્યું કે લોકો પાર્ટીમાં આવતા રહે છે, આવવું જોઈએ. અમે સારા લોકોને ખુશીથી આમંત્રણ આપ્યું છે, તેમનું સ્વાગત કર્યું છે.
વિજય રૂપાણીએ કહ્યું કે કોઈની માટે દરવાજા બંધ ન હોઈ શકે, જે સારા લોકો છે તેમનું સ્વાગત છે. તેમના માટે દરવાજા ખુલ્લા છે. પૂર્વ મુખ્યમંત્રીએ કહ્યું કે અમારી પાર્ટી ઓપન પાર્ટી છે, વહેતી ગંગા જેવી પાર્ટી છે.
જણાવી દઈએ કે આ વખતે ગુજરાત ચૂંટણીમાં ભાજપે ઐતિહાસિક જીત નોંધાવી છે. આ પહેલા ગુજરાત વિધાનસભાની ચૂંટણીમાં કોઈપણ પક્ષને આટલી બેઠકો મળી નથી. ગુજરાતમાં 1995થી અત્યાર સુધી ભાજપને એકપણ ચૂંટણીમાં હાર મળી નથી. ઉલ્લેખનીય છે કે નરેન્દ્ર મોદી વડાપ્રધાન બનતા પહેલા 13 વર્ષ સુધી ગુજરાતના મુખ્યમંત્રી રહ્યા હતા
