મોદી સરનેમ માનહાનિ કેસમાં સુપ્રીમ કોર્ટમાંથી રાહત બાદ, લોકસભા સચિવાલયે કોંગ્રેસના રાહુલ ગાંધીને વાયનાડના સાંસદ તરીકેનું તેમનું પદ પુનઃસ્થાપિત કરી દીધું. 4 ઓગસ્ટના રોજ, સર્વોચ્ચ અદાલતે બદનક્ષીના કેસમાં રાહુલ ગાંધીને દોષિત ઠેરવવા પર રોક લગાવી દીધી હતી, જેનાથી કેરળના વાયનાડથી લોકસભા સાંસદ તરીકે તેમના પુનઃસ્થાપનનો માર્ગ મોકળો થઈ ગયો હતો. ગુજરાતના સુરતની મેટ્રોપોલિટન કોર્ટે આ કેસમાં તેમને બે વર્ષની જેલની સજા ફટકાર્યાના એક દિવસ પછી, 24 માર્ચે રાહુલ ગાંધીને લોકસભાના સાંસદ તરીકે ગેરલાયક ઠેરવવામાં આવ્યા હતા.
રાહુલ ગાંધી સુપ્રીમ કોર્ટ પહોંચ્યા હતા
તમને જણાવી દઈએ કે 7 જુલાઈએ ગુજરાત હાઈકોર્ટે સજા પર સ્ટે મૂકવાની તેમની અરજીને ફગાવી દીધી હતી, ત્યારબાદ તેમણે 15 જુલાઈએ સુપ્રીમ કોર્ટનો સંપર્ક કર્યો હતો. 4 ઓગસ્ટે સુપ્રીમ કોર્ટે રાહુલની સજા પર રોક લગાવી દીધી હતી. સંસદ સભ્ય તરીકે રાહુલ ગાંધી મંગળવારથી સંસદની કાર્યવાહીમાં હાજરી આપી શકશે અને પોતાની હાજરી નોંધાવી શકશે. લોકસભા સચિવાલયના આ નિર્ણય બાદ કોંગ્રેસના કાર્યકરોએ જોરશોરથી ઉજવણી કરી હતી.
સંસદીય કાર્ય મંત્રીએ કહ્યું- અમે કાયદાકીય પ્રક્રિયાને અનુસરી
રાહુલ ગાંધીની લોકસભાની સદસ્યતા પુનઃસ્થાપિત કરવા પર સંસદીય બાબતોના મંત્રી પ્રહલાદ જોશી કહે છે, “સ્પીકરે આજે નિર્ણય લીધો. અમે કાયદાકીય પ્રક્રિયાનું પાલન કર્યું અને સુપ્રીમ કોર્ટનો આદેશ મળતાં જ અમે તેમને બહાલ કર્યા…”
સાંસદપદ જવામાં લાગ્યા 24 કલાક, મળવામાં થયો વિલંબ
કોર્ટના ચુકાદાના 24 કલાકની અંદર 24 માર્ચે રાહુલ ગાંધીએ તેમનું સાંસદ પદ ગુમાવી દીધું હતું, પરંતુ સાંસદ પદ ફરી મળવામાં થોડો સમય લાગી ગયો. 4 ઓગસ્ટે સુપ્રીમ કોર્ટના નિર્ણય બાદ કોંગ્રેસ નેતા અધીર રંજન ચૌધરીએ લોકસભા સ્પીકર ઓમ બિરલાને મળ્યા હતા. 5 ઓગસ્ટે કોર્ટના આદેશના કાગળો પોસ્ટ દ્વારા ઓમ બિરલાને મોકલવામાં આવ્યા હતા. ત્યારબાદ 7 ઓગસ્ટે સચિવાલયે એક નોટિફિકેશન બહાર પાડ્યું.
