પાકિસ્તાન થયું કંગાળ, 10000 રૂપિયાનો LPG સિલિન્ડર, ખુલ્લા સ્ટેડિયમમાં પરીક્ષા આપવા મજબૂર બન્યા 30 હજાર બાળકો, હવે આગળ શું થશે?

પાકિસ્તાનની આર્થિક સ્થિતિ દિવસેને દિવસે ખરાબ થઈ રહી છે. પાકિસ્તાનમાં આર્થિક સંકટ કેટલું વધારે છે તેનો અંદાજ એ વાત પરથી લગાવી શકાય છે કે પાકિસ્તાન સરકારે વોશિંગ્ટનમાં તેના દૂતાવાસની મિલકતના વેચાણ માટે બોલી મંગાવી છે. ઉપરાંત, ઇંધણ બચાવવા માટે શોપિંગ મોલ, મેરેજ હોલ, રેસ્ટોરન્ટ અને બજારોને વહેલા બંધ કરવાનો નિર્દેશ આપવામાં આવ્યો છે. પાકિસ્તાનમાં ક્રૂડ ઓઈલની આયાત કરવા માટે નાણાંની અછત છે. ત્યારે ખુલ્લા સ્ટેડિયમમાં 30 હજાર બાળકોની એક સાથે પરીક્ષા લેવામાં આવી રહી છે.

જણાવી દઈએ કે પાકિસ્તાન ગયા વર્ષે ભીષણ પૂરની ઝપેટમાં આવી ગયું હતું, જેના કારણે જાન-માલનું ભારે નુકસાન થયું હતું અને 33 મિલિયન લોકો પ્રભાવિત થયા હતા. વિશ્વ બેંકે 28 ઓક્ટોબર 2022 ના રોજ પ્રકાશિત તેના મૂલ્યાંકન નિવેદનમાં જણાવ્યું હતું કે પૂરથી થયેલા નુકસાન અને આર્થિક નુકસાનનો અંદાજ $30 બિલિયનથી વધુ છે. પાકિસ્તાનમાં પણ મોંઘવારી તેની ટોચ પર છે. પાકિસ્તાન બ્યુરો ઓફ સ્ટેટિસ્ટિક્સ અનુસાર, પાકિસ્તાનમાં ડિસેમ્બરમાં રેકોર્ડ 24.5 ટકા ફુગાવો નોંધાયો હતો. નિષ્ણાતોનું કહેવું છે કે 2023માં વૈશ્વિક આર્થિક મંદીના સમયમાં પાકિસ્તાનની આર્થિક સ્થિતિ વધુ ખરાબ થઈ શકે છે.

પાકિસ્તાનમાં એલપીજી સિલિન્ડરની કિંમત

પાકિસ્તાનમાં મોંઘવારી એ હદે વધી ગઈ છે કે પાકિસ્તાની રૂપિયામાં એલપીજીના એક સિલિન્ડરની કિંમત 10000 રૂપિયા  છે. અહીં એલપીજી 216 રૂપિયા પ્રતિ કિલો, ઘરેલું સિલિન્ડર 11.8 કિગ્રાના 2550 રૂપિયા અને કોમર્શિયલ સિલિન્ડર 45.4 કિગ્રાના 9804 રૂપિયાનો છે.

લોકો પ્લાસ્ટિકની થેલીઓમાં ગેસ ખરીદી રહ્યા છે 

અહીં ડીઝલ 227.80 રૂપિયા અને પેટ્રોલ 214.80 રૂપિયા પ્રતિ લીટરના ભાવે વેચાઈ રહ્યું છે, કેરોસીન તેલ 171.83 રૂપિયા પ્રતિ લીટરના ભાવે વેચાઈ રહ્યું છે. પ્રાપ્ત માહિતી અનુસાર, પાકિસ્તાનમાં કોમર્શિયલ ગેસ સિલિન્ડર 10,000 રૂપિયા સુધી પહોંચી ગયા બાદ જનતા માટે ગેસ ખરીદવું મુશ્કેલ બની ગયું છે. જેના કારણે લોકો પ્લાસ્ટિકની થેલીઓમાં ગેસ ખરીદી રહ્યા છે. એલપીજી ગેસ પ્લાસ્ટિકની થેલીઓમાં 500 થી 900 રૂપિયામાં મળે છે.

સ્ટેડિયમમાં પોલીસ કોન્સ્ટેબલની પરીક્ષા

પાકિસ્તાનની આર્થિક સ્થિતિ કેટલી ખરાબ છે કે 1667 પોલીસ કોન્સ્ટેબલ માટે 30 હજાર બાળકોને એકસાથે ખુલ્લા સ્ટેડિયમમાં પરીક્ષા માટે લઈ જવામાં આવ્યા હતા. આ પરીક્ષા ઇસ્લામાબાદના પોલીસ કોન્સ્ટેબલ માટે લેવામાં આવી હતી. પાકિસ્તાનમાં 31 ટકા યુવાનો બેરોજગાર છે.

વિદેશી મુદ્રા ભંડારમાં મોટો ઘટાડો

પાકિસ્તાનની સેન્ટ્રલ બેંક સ્ટેટ બેંક ઓફ પાકિસ્તાને જણાવ્યું હતું કે 2 ડિસેમ્બરે પૂરા થયેલા સપ્તાહમાં પાકિસ્તાનનો વિદેશી મુદ્રા ભંડાર 6.72 અબજ ડોલરની ચાર વર્ષની નીચી સપાટીએ પહોંચી ગયો છે. કેન્દ્રીય બેંકના ડેટા દર્શાવે છે કે 18 જાન્યુઆરી, 2019 ના રોજ સમાપ્ત થયેલા સપ્તાહ દરમિયાન ફોરેક્સ રિઝર્વ છેલ્લે USD 6.64 બિલિયન નોંધાયું હતું.

પાકિસ્તાનના માથે ભારે દેવું

વિશ્વ બેંકે તેના તાજેતરમાં પ્રકાશિત વાર્ષિક ડેટ રિપોર્ટમાં અનુમાન લગાવ્યું છે કે 2021 સુધીમાં પાકિસ્તાનનું કુલ બાહ્ય દેવું $130.433 બિલિયન હતું. દેશે નાણાકીય વર્ષ 2023 સુધીમાં 33 અબજ બિલિયન ડોલરનું દેવું ચૂકવવાનું છે.