જમ્મુ-કાશ્મીરના પૂર્વ સીએમ અને ડેમોક્રેટિક પ્રોગ્રેસિવ આઝાદ પાર્ટીના વડા ગુલામ નબી આઝાદે ફરી એકવાર કોંગ્રેસ પર જોરદાર પ્રહારો કર્યા છે. તેમણે પૂર્વ પીએમ ઇન્દિરા ગાંધી અને સોનિયા ગાંધીની નેતૃત્વ ક્ષમતાની તુલના કરતા સોનિયા પર સવાલો ઉઠાવ્યા છે. ગાંધી પરિવારના વફાદાર રહેલા આઝાદે કહ્યું કે કોંગ્રેસમાં કામ કરવાની રીત બદલાઈ ગઈ છે અને ટોચના નેતાઓ સુધી પાર્ટીના નેતાઓની પહોંચ નથી. આઝાદે આ દરમિયાન રાહુલ ગાંધી પર પણ નિશાન સાધ્યું છે.
ગુલામ નબી આઝાદે હાલમાં જ એક કાર્યક્રમ દરમિયાન પીએમ મોદીના વખાણ કર્યા હતા. તેમણે એમ પણ કહ્યું હતું કે વિપક્ષ હોવા છતાં વડાપ્રધાને ક્યારેય બદલાની ભાવનાથી તેમની સાથે કોઈ કામ કર્યું નથી. કોંગ્રેસ પાર્ટીના કામ કરવાની રીત પર સવાલ ઉઠાવતા આઝાદે કહ્યું છે કે પાર્ટી ‘નિયુક્તિ કલ્ચર’ના મોડલ પર ચાલી રહી છે.
ઇન્દિરા અને સોનિયા ગાંધી વચ્ચે સરખામણી
ગુલામ નબી આઝાદે કહ્યું કે આજકાલ પાર્ટીમાં માત્ર નિમણૂકો જ થાય છે. તેમનો આક્ષેપ છે કે હવે ગંભીર મુદ્દાઓની પણ લાપરવાહી કરવામાં આવી રહી છે. તેમણે કહ્યું કે આજના સમયમાં પાર્ટીએ ચૂંટણી પ્રક્રિયા દ્વારા નિમણૂકોની પરંપરા છોડી દીધી છે. માત્ર એક-બે નેતાઓ પાસે જ તમામ જવાબદારી છે. પૂર્વ વડાપ્રધાન ઇન્દિરા ગાંધીનો ઉલ્લેખ કરતા આઝાદે તે સમયને યાદ કર્યો જ્યારે ઇન્દિરાએ તેમને યુથ કોંગ્રેસના અધ્યક્ષ બનાવીને તેમની સાથે કામ કરવાની તક આપી હતી.
ઇન્દિરા ગાંધી હતા સૌથી વધુ લોકતાંત્રિક
ઇન્દિરા ગાંધીની સરમુખત્યારશાહી ઈમેજ અંગે આઝાદે કહ્યું કે આ તદ્દન ખોટી હકીકત છે. તેમણે કહ્યું કે ઇન્દિરા ગાંધીનું નેતૃત્વ ખૂબ જ લોકતાંત્રિક હતું અને તેઓ સૌથી વધુ લોકશાહીમાં માનનારા નેતા હતા. તેમણે કહ્યું કે તે સમયે તેમની પહોંચ ઇન્દિરા ગાંધી સુધી હતી, પરંતુ આજના સમયમાં કોંગ્રેસના ઘણા વરિષ્ઠ નેતાઓ પણ સોનિયા ગાંધીને મળી શકતા નથી.
આ દરમિયાન ગુલામ નબી આઝાદે રાહુલ ગાંધી પર પણ પ્રહારો કર્યા. તેમણે કહ્યું કે પાર્ટી છોડતા પહેલા હિમંતા બિસ્વા સરમા રાહુલ ગાંધીને મળવા આવ્યા હતા અને તેમણે રાહુલ સમક્ષ ફરિયાદો મૂકી હતી, જેના પર કોઈ ધ્યાન આપવામાં આવ્યું ન હતું. આઝાદે કહ્યું કે રાહુલે હિમંતાના કેસને ગંભીરતાથી લીધો નથી અને જ્યારે તેમને આ વિશે પૂછવામાં આવ્યું તો રાહુલે કહ્યું કે હિમંતાને જવા દો.
લાંબી છે ગુલામ નબી આઝાદની કારકિર્દી
જણાવી દઈએ કે ગુલામ નબી આઝાદ લાંબા સમય સુધી કોંગ્રેસમાં દિગ્ગજ નેતા રહ્યા છે. તેમણે પાર્ટીમાં ઈન્દિરા, રાજીવ, સોનિયા અને રાહુલ બધા સાથે કામ કર્યું છે. જમ્મુ-કાશ્મીરના પૂર્વ સીએમ હોવા ઉપરાંત તેઓ લાંબા સમય સુધી કોંગ્રેસ પાર્ટીના રાજ્યસભાના સાંસદ પણ હતા. તેમના છેલ્લા કાર્યકાળ દરમિયાન, પાર્ટી હાઈકમાન્ડ સાથે તેમના મતભેદો થયા હતા, જેના કારણે તેમણે ગયા વર્ષે કોંગ્રેસ છોડી દીધી હતી અને નવી પાર્ટી બનાવી હતી. મોદી સરકારે તેમને પદ્મ ભૂષણ આપવાની પણ જાહેરાત કરી હતી.
