મહારાષ્ટ્રની રાજનીતિમાં કાકા-ભત્રીજા વચ્ચેના પરસ્પર વિદ્રોહથી એવો પલટો આવ્યો, જેની શરદ પવારે પણ કલ્પના નહીં કરી હોય. ભત્રીજા અજિત પવારે કાકા શરદ પાવવારને એવી ભેટ આપી કે મહારાષ્ટ્ર સરકારમાં ડેપ્યુટી સીએમની ખુરશી પર જઈને બેસી ગયા. અજિત પવારે તેમના કાકા શરદ પવાર સાથે બરાબર એ જ રમત રમી જે રીતે મહારાષ્ટ્રના હાલના મુખ્ય મંત્રી એકનાથ શિંદે થોડા મહિનાઓ પહેલાં ઉદ્ધવ ઠાકરે સાથે રમી હતી. મહારાષ્ટ્રના રાજકારણમાં અચાનક આવેલું આ તોફાન હવે બિહાર સુધી પહોંચી ગયું છે.
એવો દાવો કરવામાં આવી રહ્યો છે કે બિહારની નીતીશ કુમાર સરકારમાં ટૂંક સમયમાં મોટી ઉથલપાથલ જોવા મળી શકે છે. બિહારમાં પલટુબાજ નેતાનું બિરુદ મેળવનાર નીતીશ કુમાર ક્યારે પોતાના ફાયદા માટે કંઈ પણ કરી શકે છે, જેના વિશે અંદાજો પણ ન લગાવી શકાય. ત્યારે મહારાષ્ટ્ર બાદ હવે સમગ્ર દેશની નજર બિહારના રાજકારણ પર ટકેલી છે. બિહાર સરકારને લઈને અહીં અલગ-અલગ દાવા કરવામાં આવી રહ્યા છે. કેટલાક લોકો કહી રહ્યા છે કે નીતીશ કુમાર ટૂંક સમયમાં ચૂંટણી પહેલા ફરીથી બીજેપીના ખોળામાં જઈને બેસી શકે છે, જ્યારે કેટલાક લોકો દાવો કરી રહ્યા છે કે તેમની પાર્ટી જેડીયુ પણ બે ભાગમાં વહેંચાઈ ગઈ છે. આવી સ્થિતિમાં બિહારની રાજનીતિમાં સર્જાયેલો ભૂકંપ ક્યાં જઈને શાંત થશે તે કહેવું ઘણું મુશ્કેલ બની ગયું છે.
જેડીયુમાં જ વિભાજન
બિહારના મુખ્યમંત્રી નીતીશ કુમારે વારંવાર પક્ષ બદલવાને કારણે માત્ર રાજકીય પક્ષોમાં જ નહીં પરંતુ સામાન્ય જનતામાં પણ પોતાની વિશ્વસનીયતા ગુમાવી દીધી છે. તેમની પાર્ટી જેડીયુના ઘણા નેતાઓ નીતીશ કુમારથી નારાજ છે અને વિવિધ મુદ્દાઓ પર અલગ-અલગ વિચાર ધરાવે છે. આવી સ્થિતિમાં, એવું કહેવામાં આવી રહ્યું છે કે નીતીશ કુમાર લાંબા સમય સુધી બિહારની સરકાર સંભાળી શકશે નહીં, કારણ કે તેમની પાર્ટીમાં ભાગલા થવાની સંભાવના વધી ગઈ છે. તે જ સમયે, કેટલાક સૂત્રો કહી રહ્યા છે કે નીતીશ આવનારા તોફાનને ઓળખવામાં નિપુણ ખેલાડી છે. આવી સ્થિતિમાં, તે તોફાનના આવતા પહેલા જ ભાજપ તરફ વળી શકે છે. થોડા દિવસો પહેલા જ બિહારમાં જનસુરાજ પાર્ટીના સ્થાપક પ્રશાંત કિશોરે દાવો કરીને આશંકા વધુ વધારી દીધી છે કે નીતીશ કુમાર તેમની મુખ્યમંત્રીની ખુરશી વધુ સમય સુધી સુરક્ષિત રાખી શકશે નહીં.
ભાજપના નેતાઓ કરી રહ્યા છે દાવો
બીજેપી નેતા સુશીલ મોદીએ કહ્યું કે મહારાષ્ટ્રમાં NCPની આ હાલત બિહારમાં 2024માં રાહુલ ગાંધીને PM તરીકે પ્રોજેક્ટ કરવાના કારણે થઈ છે. NCPના મોટાભાગના નેતાઓ રાહુલ ગાંધીને PM તરીકે સ્વીકારી શક્યા નથી. એવી જ સ્થિતિ હવે બિહારમાં જેડીયુમાં થવાની છે. સુશીલ મોદીએ દાવો કર્યો કે જેડીયુના બહુમતી નેતાઓ પણ રાહુલ ગાંધીને પીએમ પદના ઉમેદવાર તરીકે સ્વીકારશે નહીં. તેથી જ તેઓએ બળવો કરી દીધો છે. એટલા માટે નીતીશ કુમાર પહેલીવાર પોતાની પાર્ટીના ધારાસભ્યોને અલગથી મળી રહ્યા છે. તેમને ડર છે કે તેમના ધારાસભ્યો પક્ષ બદલી શકે છે. બીજી તરફ કેન્દ્રીય મંત્રી રામદાસ આઠવલેએ કહ્યું છે કે જે ખેલ મહારાષ્ટ્રમાં થયો તે જ ખેલ બિહારમાં પણ થવાનો છે. જેના કારણે બિહારના રાજકારણમાં હલચલ મચી ગઈ છે. નીતીશ પોતાની ખુરશી બચાવવા શું કરશે તે તો આવનારો સમય જ કહેશે.
