IPLમાં ફરી ઘમાલ મચાવશે લસિથ મલિંગા, મુંબઈ ઈન્ડિયન્સે સોંપી આ મહત્ત્વપૂર્ણ જવાબદારી

શ્રીલંકાના ભૂતપૂર્વ ફાસ્ટ બોલર લસિથ મલિંગાને મુંબઈ ઈન્ડિયન્સે પોતાના બોલિંગ કોચ તરીકે ટીમમાં સામેલ કર્યો છે. લસિથ મલિંગા IPL 2024 પહેલા પાંચ વખતની ચેમ્પિયન મુંબઈ ઈન્ડિયન્સમાં પુનરાગમન કરવા માટે તૈયાર છે. ન્યૂઝીલેન્ડના પૂર્વ ફાસ્ટ બોલર શેન બોન્ડના રાજીનામા બાદ લસિથની આ પદ માટે પસંદગી કરવામાં આવી હતી. લસિથને મુંબઈ ઈન્ડિયન્સની ટીમમાં બોલિંગ કોચ તરીકે નિયુક્ત કરવામાં આવ્યા બાદ તેણે પણ પ્રતિક્રિયા આપી છે.

MIમાં હવે લસિથ મલિંગા બોલિંગ કોચ 

વાસ્તવમાં, લસિથ મલિંગા ફરી એકવાર મુંબઈની ટીમમાં ધમાલ કરવા માટે તૈયાર છે. આ વખતે તેને બોલિંગ નહીં પણ બોલિંગ કોચની જવાબદારી સોંપવામાં આવી છે. હવે મલિંગા રોહિત શર્માની મુંબઈ ઈન્ડિયન્સની બોલિંગને વધુ ધાર આપશે. અગાઉ, લસિથ મલિંગાએ MI ન્યૂયોર્ક માટે બોલિંગ કોચ અને SA20 માં MI કેપ ટાઉન માટે બોલિંગ કોચ તરીકે કામ કર્યું હતું. મુંબઈ ઈન્ડિયન્સ દ્વારા બોલિંગ કોચ તરીકે નિયુક્ત થયા બાદ લસિથે કહ્યું કે, મુંબઈ ઈન્ડિયન્સના બોલિંગ કોચ તરીકે નિયુક્ત થવું મારા માટે ખરેખર સન્માનની વાત છે. હું માર્ક બાઉચર અને રોહિત સાથે કામ કરવા ઉત્સુક છું. હું ખાસ કરીને બોલિંગ યુનિટનું ધ્યાન રાખીશ.

શેન બોન્ડની જગ્યાએ લસિથ મલિંગા 

પાંચ વખતની ચેમ્પિયન મુંબઈ ઈન્ડિયન્સે આઈપીએલ 2024ની તૈયારીઓ શરૂ કરી દીધી છે. શેન બોન્ડની જગ્યાએ હવે લસિથ મલિંગા ટીમમાં નવો બોલિંગ કોચ હશે. મુંબઈ ઈન્ડિયન્સ સાથે મલિંગાની કારકિર્દી શાનદાર રહી છે. તેના હેઠળ, ટીમે પાંચ વખત IPL ટાઇટલ જીત્યું, જેમાં 2011માં ચેમ્પિયન્સ લીગ T20 જીતવા સિવાય ચાર IPL ટાઇટલ (2013, 2015, 2017, 2019)નો સમાવેશ થાય છે.