આ વખતે માત્ર ટોપ-10 ઉમેદવારોની જ મિલકતનો આંકડો 2300 કરોડ, 2017માં 182 ધારાસભ્યોની કુલ મિલકત 1400 કરોડથી વધારે હતી

આ વખતની ગુજરાત વિધાનસભા ચૂંટણીમાં કુલ 1621 ઉમેદવારોમાંથી 330 ઉમેદવાર એટલે કે 20 ટકા ગુનાઇત ઇતિહાસ ધરાવે છે. 192 એટલે 12 ટકા સામે ગંભીર ગુનાઓ છે.2017ની ચૂંટણીમાં કુલ 1828 ઉમેદવારોએ ઝંપલાવ્યું હતું. જેમાંથી 254 એટલે કે 14 ટકા ગુનાહિત ઇતિહાસ ધરાવતા હતા. 154 એટલે કે 8 ટકા સામે ગંભીર પ્રકારના ગુનાઓ હતા. 2017માં વિજેતા બનેલા 182માંથી 47 (26 ટકા) ધારાસભ્યો સામે ગુનાઓ છે જ્યારે 33 (18 ટકા) સામે ગંભીર ગુનાઓ છે. ભાજપના 181માંથી 46(25 ટકા) તો કૉંગ્રેસના 176માંથી 56 (32 ટકા) એ પોતાની સામે કેસ હોવાનું જાહેર કર્યું હતું.

2017માં જીતેલા 182 ધારાસભ્યોની કુલ મિલકતનો આંકડો રૂ. 1400 કરોડથી વધારે થાય છે. 2022માં વધુ સંપત્તિ ધરાવતા ટોપ 10 ઉમેદવારોની સંપત્તિ જ રૂ. 2300 કરોડથી પણ વધારે છે. એડીઆર રિપોર્ટ મુજબ, 182માંથી 54 એટલે કે 30 ટકાએ તેમની મર્યાદાની 50 ટકાથી પણ ઓછો ખર્ચ કર્યો હતો. ધારાસભ્યોએ સરેરાશ 16.45 લાખ ખર્ચ કર્યો હતો. ભાજપના ધારાસભ્યોનો સરેરાશ ખર્ચ 17.34 લાખ જ્યારે કૉંગ્રેસના ધારાસભ્યો દ્વારા 15,99 લાખ ખર્ચ કરાયો હતો. બે ધારાસભ્યો હિંમતનગરના રાજેન્દ્રસિંહ ચાવડાએ રૂ. 33.78 લાખ ખર્ચ કર્યો હતો જ્યારે સંતરામપુરના કુબેરભાઇ ડીંડોરે રૂ. 28, 95 લાખ ખર્ચ કર્યો હતો. લુણાવાડાના અપક્ષ રતનસિંહ રાઠોડે રૂ.૩ લાખ, બેચરાજીના કોંગ્રેસના ભરતજી ઠાકોરે રૂ. 3.81 લાખ, વડગામમાં અપક્ષ લડેલા જિજ્ઞેશ મેવાણીએ રૂ. 5.20 લાખ ખર્ચ કર્યો હતો. 67 ટકાએ પક્ષ પાસેથી ફંડ મેળવ્યું હતું, 22 ટકાએ પોતાની રીતે ફંડ એકત્ર કર્યું હતું. 46 ધારાસભ્યોએ એવું જાહેર કર્યું હતું કે તેમને પક્ષ દ્વારા કોઇ ફંડ મળ્યું નથી. ભાજપમાં ધારાસભ્યોને સરેરાશ 56 ટકા ફંડ અને કોંગ્રેસમાં 80 ટકા પક્ષમાંથી મળ્યું હતું. ભૂપેન્દ્ર પટેલે 15.19 લાખ ખર્ચ કર્યો હતો.