85મુ કોંગ્રેસ અધિવેશન: મલ્લિકાર્જુન ખડગેએ કહ્યું, ‘ભાજપ સાથે મુકાબલો કરવા માટે યુપીએ જેવું ગઠબંધન કરવાનો સમય આવી ગયો છે’

કોંગ્રેસના પ્રમુખ મલ્લિકાર્જુન ખડગેએ શનિવારે કહ્યું કે સમાન વિચારધારા ધરાવતા પક્ષો સુધી પહોંચવાનો અને યુપીએની જેમ ગઠબંધન બનાવવાનો સમય આવી ગયો છે. 85માં કોંગ્રેસ અધિવેશનમાં અધ્યક્ષનું ભાષણ આપતા ખડગેએ કહ્યું કે, “કોંગ્રેસ તે તમામ પક્ષોને સાથે લેવા તૈયાર છે જે ભાજપનો વિરોધ કરે છે.” તેમણે કહ્યું કે ભૂતકાળમાં ઘણા રાજકીય પક્ષો યુપીએ સાથે હતા અને મનમોહન સિંહે ઈમાનદારીથી સરકારનું નેતૃત્વ કર્યું હતું. જો કે, સરકાર સામે એક મોટું ષડયંત્ર હતું. આ તે પક્ષો માટે એક સંદેશ તરીકે આવ્યો છે જે યુપીએ સરકારનો ભાગ હતા પરંતુ હવે કોંગ્રેસને ગઠબંધનમાં અગ્રણી ભૂમિકા આપવા તૈયાર નથી.

અમે બંધારણ અને લોકશાહીનું પાલન કરીશું- ખડગે

કોંગ્રેસ રાજકીય પક્ષો વચ્ચે સંતુલન જાળવવાનો પ્રયાસ કરી રહી છે જે કોંગ્રેસના ગઠબંધનની આગેવાની કરવાના વિચારનો વિરોધ કરી રહ્યા છે. ભાજપને બહુમતી નહીં મળે તેવું ભારપૂર્વક જણાવતા ખડગેએ કહ્યું કે કોંગ્રેસ નેતૃત્વ કરશે અને અમને બહુમતી મળશે. અમે બંધારણ અને લોકશાહીનું પાલન કરીશું. કોંગ્રેસ ગઠબંધન સમિતિ બનાવવા માટે અન્ય વિપક્ષી પક્ષો સાથે સંપર્ક કરે તેવી શક્યતા છે અને રાયપુરમાં પાર્ટીના પૂર્ણ સત્ર દરમિયાન તેની ચર્ચા થઈ શકે છે.

માહિતી અનુસાર, કોંગ્રેસ રાષ્ટ્રીય ગઠબંધન કરવા માંગે છે, પરંતુ તેના નેતૃત્વની પૂર્વશરત સાથે. એવા ઘણા સમાન વિચારધારાવાળા પક્ષો છે જેમને મહાગઠબંધનમાં કોંગ્રેસ અગ્રણી પક્ષ હોવાથી કોઈ સમસ્યા નથી, પરંતુ તેલંગાણાના મુખ્યમંત્રી કે. ચંદ્રશેખર રાવ, તૃણમૂલ કોંગ્રેસ અને આમ આદમી પાર્ટી જેવા નેતાઓ એક અલગ લાઇન દોરી રહ્યા છે.