હાલમાં સરકારી પરીક્ષામાં ગેરરીતિને લઈને સમગ્ર રાજ્યમાં જોરદાર ઘમાસાણ ચાલી રહ્યું છે. ડમીકાંડ મામલે પોલીસે અત્યાર સુધી 4 આરોપીઓની પણ ધરપકડ કરી છે. બીજી તરફ વિદ્યાર્થી નેતા યુવરાજસિંહ પર પૈસા લઈ નામ જાહેર ન કરવાનો ગંભીર આરોપ પણ લાગ્યો છે. આથી આ મામલે હવે રાજનીતિ ગરમાઈ છે. ત્યારે યુવરાજ સિંહે પણ પોતાની પર લાગેલા તમામ આરોપોને ફગાવ્યા છે.
મીડિયા અહેવાલ મુજબ, પોતાની પર લગાવવામાં આવી રહેલા આરોપોને ફગાવતા યુવરાજસિંહે દાવો કરતા જણાવ્યું કે, ભૂતકાળમાં 2.5 કરોડની ઓફર મને આપવામાં આવી હતી. પરંતુ, કોઈની પાસેથી એક પણ રૂપિયો ન લીધો અને કોઈનું નામ પણ છુપાવ્યું નહીં. અધિકારીઓને ડમી વિદ્યાર્થીઓ અને એજન્ટોના નામ આપ્યા હોવાનો પણ યુવરાજ સિંહે ખુલાસો કર્યો છે.
‘મને 2.5 કરોડ સુધીની ઓફર પણ કરી હતી’
મીડિયા અહેવાલ મુજબ, વિદ્યાર્થી નેતા યુવરાજ સિંહે કહ્યું કે, બિપીન ત્રિવેદી સામાજિક એજન્ટ બનીને મારી પાસે આવ્યા હતા. રાજકીય ષડયંત્રના ભાગરુપે પોતાના સમાજને બચાવવા મારા પર આરોપ લગાવવામાં આવ્યા છે. તેમણે વધુમાં કહ્યું કે, પ્રદીપ, પીકે સહિતના એજન્ટો સાથે જાણકારી કઢાવવા માટે હું મળ્યો હતો. એજન્ટોએ મને 40 લાખથી 2.5 કરોડ સુધીની ઓફર પણ કરી હતી. જ્યારે લાભ લેવા માટે બિપીનભાઈ મધ્યસ્થી બન્યા હતા. જે મારા પરિવારને ધમકાવી શકે તે લોકો કોઈપણ હદે જઈ શકે છે. આ કિસ્સાને રાજકીય રંગ આપવાનો પ્રયાસ કરવામાં આવી રહ્યો છે. મને રાજકીય કદ વધારવામાં જરાય રસ નથી.
તમામ લોકોનો ઓડિયો હોવાનો પણ યુવરાજ સિંહનો દાવો
યુવરાજ સિંહે ભાવનગરમાં બિપિન ત્રિવેદી શિક્ષક તરીકે ફરજ બજાવતા હોવાનો અને મિત્રતાના ભાવે સંપર્કમાં આવ્યા હોવાની વાત કરી છે. સાથે જ પોતાની પાસે તમામ લોકોનો ઓડિયો હોવાનો પણ યુવરાજ સિંહનો દાવો છે. જણાવી દઈએ કે, રાજ્યવ્યાપી ડમી કૌભાંડને લઇને વિદ્યાર્થી અને યુવા નેતા યુવરાજસિંહ પર ગંભીર આરોપ લાગતા રાજ્યભરમાં ખળભળાટ મચી ગયો છે. જ્યારે આ મામલ હવે રાજનીતિ પણ ગરમાઈ છે. બિપિન ત્રિવેદી નામના વ્યક્તિએ યુવરાજસિંહ પર ડમી કૌભાંડમાં નામ ન લેવા માટે 45 લાખ રૂપિયા લીધા હોવાનો ગંભીર આરોપ લગાવ્યો છે.
