અનહેલ્ધી લાઇફસ્ટાઇલ અને બિનઆરોગ્યપ્રદ ખોરાકની આદતોના કારણે ગંભીર રોગોનો કહેર દિવસેને દિવસે વધી રહ્યો છે. કેન્સરના દર્દીઓ વધી રહ્યા છે. હાઈ બ્લડ પ્રેશરના દર્દીઓની સંખ્યા વધી રહી છે. ડાયાબિટીસનો રોગ પણ પોતાની પાંખો ફેલાવી રહ્યો છે. પહેલા આ બીમારીઓ મોટી ઉંમરના લોકોને ઘેરી લેતી હતી. જો કે, આજકાલ આ બીમારીઓ યુવાનો અને બાળકોમાં પણ ઝડપથી ફેલાઈ રહી છે. એક રિપોર્ટ મુજબ, વર્ષ 2050 સુધીમાં વિશ્વની લગભગ એક અબજ વસ્તી (100 કરોડ) ડાયાબિટીસની ઝપેટમાં આવી શકે છે.
‘મિરર’ના અહેવાલ મુજબ, શિક્ષણવિદોનું કહેવું છે કે વિશ્વના દરેક દેશ અને દરેક ઉંમરના લોકોમાં આ રોગનો કહેર વધશે. એટલે કે 2050 સુધીમાં ડાયાબિટીસથી પીડિત લોકોમાં માત્ર વૃદ્ધો જ નહીં, પરંતુ તેમની સાથે આધેડ, યુવાનો અને બાળકોનો પણ સમાવેશ થશે. ડાયાબિટીસને લગતા એક સંશોધનમાં આ આગાહી કરવામાં આવી છે. ધ લેન્સેટ ડાયાબિટીસ એન્ડ એન્ડોક્રિનોલોજી જર્નલમાં પ્રકાશિત આ સંશોધનમાં કહેવામાં આવ્યું છે કે, વર્ષ 2050 સુધીમાં આ રોગ આખી દુનિયામાં ફેલાઈ જશે. આઠમાંથી 1 વ્યક્તિ આ રોગથી પીડાશે.
આક્રમક રીતે વધી રહી છે આ બીમારી!
એક અબજનો આ આંકડો 2021ના 53 કરોડ કેસ કરતાં બમણો છે. ન્યૂયોર્કમાં આલ્બર્ટ આઈન્સ્ટાઈન કોલેજ ઓફ મેડિસિનનાં ડોક્ટર શિવાની અગ્રવાલે જણાવ્યું કે, ડાયાબિટીસ આ સમયે સૌથી મોટા સ્વાસ્થ્ય ખતરામાંથી એક છે. આગામી 3 દાયકામાં આ રોગ દરેક દેશમાં, દરેક લિંગ અને દરેક વય જૂથમાં આક્રમક રીતે વધશે.
ભારતમાં 10.1 કરોડથી વધારે દર્દી
ડાયાબિટીસ વધવાનું એક કારણ અસ્વસ્થ આહાર છે. આજકાલ લોકો બિનઆરોગ્યપ્રદ વસ્તુઓ વધુ ખાવા લાગ્યા છે. આ જ કારણ છે કે, આ રોગના ઝડપી ફેલાવવાની શક્યતાઓ છે. ધ લેન્સેટના અભ્યાસ મુજબ, ભારતમાં હાલમાં 10.1 કરોડથી વધુ લોકોને ડાયાબિટીસ છે. છેલ્લા ચાર વર્ષમાં આ રોગના દર્દીઓમાં ઝડપી ઉછાળો જોવા મળ્યો છે.
