મુંબઈમાં બનેલા ગેટ વે ઓફ ઈન્ડિયામાં તિરાડો પડી રહી છે. કેન્દ્રીય સંસ્કૃતિ મંત્રી જી કિશન રેડ્ડીએ લોકસભામાં એક પ્રશ્નના જવાબમાં આ માહિતી આપી હતી. તેમણે કહ્યું કે ગેટવે ઓફ ઈન્ડિયાના નિરીક્ષણ દરમિયાન સપાટી પર કેટલીક તિરાડો મળી આવી છે પરંતુ એકંદર માળખું સારી સ્થિતિમાં છે. વાસ્તવમાં, તેમને પૂછવામાં આવ્યું હતું કે શું તાજેતરના ‘ગેટવે ઑફ ઈન્ડિયા’ના સ્ટ્રક્ચરલ ઑડિટમાં આગળના ભાગમાં તિરાડ જોવા મળી છે?
તેમણે જવાબ આપ્યો કે ગેટવે ઓફ ઈન્ડિયા કેન્દ્રીય રીતે સંરક્ષિત સ્મારક નથી. તે મહારાષ્ટ્ર સરકારના પુરાતત્વ અને સંગ્રહાલય વિભાગના સંરક્ષણ હેઠળ છે. નિરીક્ષણ દરમિયાન સપાટી પર કેટલીક તિરાડો મળી આવી હતી. જો કે, એકંદર માળખું વધુ સારી સ્થિતિમાં હોવાનું જણાયું હતું. બિલ્ડિંગ પર ઘણી જગ્યાએ છોડ પણ ઉગેલા જોવા મળ્યા છે. ગુંબજ પર વોટરપ્રૂફિંગ અને સિમેન્ટ કોંક્રીટને પણ નુકસાન થયું છે. જે બાદ રાજ્યના પુરાતત્વ અને સ્થાપત્ય નિર્દેશાલયે રિનોવેશન માટે સરકારને 6.9 કરોડની દરખાસ્ત રજૂ કરી છે.
10 માર્ચે બજેટ મંજૂર થયું
મંત્રીને આગળ પૂછવામાં આવ્યું કે શું તેમને આ સંબંધમાં કોઈ રિપોર્ટ સોંપવામાં આવ્યો છે, તો કિશન રેડ્ડીએ કહ્યું કે આ સંબંધમાં કેન્દ્ર સરકારને કોઈ રિપોર્ટ આપવામાં આવ્યો નથી. પુરાતત્વ અને સંગ્રહાલય વિભાગે વિગતવાર સ્થળ વ્યવસ્થાપન યોજના તૈયાર કરી છે. ગેટવે ઓફ ઈન્ડિયાના સંરક્ષણ અને સમારકામ માટે 8,98,29,574 રૂપિયાની રકમ અંદાજવામાં આવી છે. તેમણે કહ્યું કે, મહારાષ્ટ્ર સરકારના પ્રવાસન અને સાંસ્કૃતિક બાબતોના વિભાગે 10 માર્ચે તેને મંજૂરી આપી છે.
