હાલ રાજ્યમાં જગતનો તાત કુદરતી આફતથી પરેશાન થઈ ગયો છે. દર વરસે દક્ષિણ ગુજરાતમાં કમોસમી માવઠાના કારણે જગતનો તાત દુ:ખી છે. ત્યારે ફરી એકવાર પવન સાથે આવેલા વાવઝોડાએ ખેતી પાકને તહસ-નહસ કરી નાખતા જગતનો તાતને રાતે પાણીએ રોવાનો વારો આવ્યો છે.
કહેવાય છે દુનિયા માટે એક ભગવાન આકશમાં આબે, બીજો ભગવાન જગતના તાતને માનવામાં આવે છે. પરંતુ, આજકાલ ધરતી પરના ભગવાન એવા જગતના તાતની હાલત દયનીય બની જવા પામી છે. છેલ્લા કેટલા વર્ષોથી ખેડૂતોની હાલત કુદરતી આફતોના કારણે બગડી છે. માંડ હિંમત રાખી ખેડૂત ઊભો થાય ત્યાં ફરી ભગવાન પરીક્ષા લેતો હોય એમ તૂફાન અને કમોસમી વરસાદ આવી જાય આવો જ હાલ જોવા મળી રહ્યો છે. દક્ષિણ ગુજરાતમાં હાલમાં પવન સાથે આવેલા કમોસમી વરસાદે ખેડૂતોની કમર તોડી નાખી છે. કેમ કે, રાત-દિવસ માવજાત કરી ઊભા કરેલા બાગાયતી પાક જમીન દોસ્ત થયા ખેડૂતને રાતા પાણી રોવાનો વારો આવ્યો છે.
આમતો દક્ષિણ ગુજરાતમાં શેરડી, ડાંગર, શાકભાજી અને સૌથી વધુ બાગાયતી પાક લેવામાં આવે છે. તેમાંય નવસારી, વલસાડ, સુરત, ભરૂચ જેવા વિસ્તારોમાં કેરી અને કેળાનો પાક સૌથી વધુ લેવામાં આવે છે. ચાલુ વર્ષે કેરી અને કેળાંનો પાક તૈયાર હતો, માત્ર ખેડૂત ઉતારાની રાહ જોઈને બેઠા હતા. એવા સમયે અચાનક વાતાવરણમાં પલટો આવ્યો અને વીજળીના કડાકા-ભડાકા સાથે ભારે પવન સાથે વાવાઝોડું ત્રાટકતા કેરી અને કેળાંનો ઊભો પાક જમીન દોસ્ત થઈ જતાં ખેડૂતોને લાખો રૂપિયાનું નુકસાન થવા પામ્યું છે. ખેડૂતો લાચાર અને નિસહાય બની હવે ફરિયાદ કોને કરવી ત્યારે રાજ્ય સરકારે ખેડૂતોની વહારે આવી ખેડૂતોનું નુકસાનીનું સરવે કરાવી વળતર આપે એવી હાથ જોડી પ્રાર્થના કરી રહ્યાં છે.
છેલ્લા કેટલા વર્ષોથી ગુજરાતના ખેડૂતો માવઠાંનો માર સહન કરી રહ્યાં છે. અગાઉ ઓખી, તાઉતે, વાયુ જેવા અનેક સાયક્લોન સહન કર્યા છે. હજી એના માર સરભર થયો નથી, ત્યાં જ અચાનક આવેલા વાવાઝોડાં એ ફરી એકવાર દક્ષિણ ગુજરાતનાં ખેડૂતોની ચિંતામાં વધારો કરી દીધો છે. ખેડૂતો લાચાર અને નિ:સહાય બની ગયા છે. એકતરફ મોંઘવારી અને મોંઘા બિયારણ અને મજૂરી ખર્ચ કરી પોતાના કિંમતી પાક આંખ સામે તહસ-નહસ થઈ જાય ત્યારે ખેડૂતોની શું હાલત થાય એ તો ખેડૂત જ જાણે. ત્યારે સરકારે સહાય રૂપી મલમ લગાવી જગતના તાતને જીવનદાન આપવું જોઈએ.
જગતનો તાત આમતો દુનિયાના લોકો સુધી કાળી મજૂરી કરી અન્ન પેદા કરે છે, ફળ પેદા કરે છે, પણ જાણે કુદરત જગતના તાત સાથે રિસાઇ હોય એમ દર વરસે કુદરત આફત લઈને આવે છે. ખેડૂત આકાશ તરફ મિંટ માંડી ભગવાનને પ્રાર્થના સિવાય બીજું કરી પણ સકતો નથી. એક તરફ કુદરત રિસાઈ છે અને બીજી તરફ સરકાર આ ખેડૂતોની વહારે આવે એવી માગ ખેડૂત કરી રહ્યો છે. ગુજરાતીમાં એક કહેવત છે કે માણસ ધારે શું અને કુદરત કરે શું..?
