સુરતમાં એક 26 વર્ષીય યુવકે અલગ-અલગ બિઝનેસ કર્યા બાદ ઓનલાઇન બિઝનેસમાં પણ નિષ્ફળતા મળતા નિરાશ થઈને બિલ્ડિંગના ચોથા માળેથી કૂદીને આત્મહત્યા કરી છે. બિલ્ડિંગના પાછળના ભાગે યુવક બેભાન મળી આવતા રહીશો યુવકને હોસ્પિટલ લઈ ગયા હતા, જ્યાં તબીબે તેને મૃત જાહેર કર્યો હતો. આશાસ્પદ યુવકના મોતથી પરિવારનો શોકમાં ગરકાવ થયો છે.
સુરતના યોગીચોક સાવલિયા સર્કલ ખાતે આવેલ શિવપૂજન એપાર્ટમેન્ટમાં રહેતા મૂળ અમરેલીના હરીપુરાનો વતની 26 વર્ષીય અંકિત મનહરભાઈ પાદરિયા પરિવાર સાથે રહેતો હતો. અલગ અલગ વેપારમાં નિષ્ફળતા બાદ તેને ઓનલાઇન વેપાર શરૂ કર્યો હતો. જો કે, તેમાં પણ નુકસાન જતા અંકિત ખૂબ જ હતાશ થયો હતો. દરમિયાન રાતે તે ઘરે ન આવતા પરિવારે શોધખોળ આદરી હતી. ત્યારે બિલ્ડિંગની પાછળના ભાગે અંકિત બેભાન અવસ્થામાં મળી આવ્યો હતો.
પોલીસે ગુનો નોંધી તપાસ હાથ ધરી
આથી અંકિતને સારવાર માટે ત્વરિત સ્મીમેર હોસ્પિટલ લઈ જવામાં આવ્યો હતો. જ્યાં ફરજ પરના તબીબે અંકિતને મૃત જાહેર કર્યો હતો. આ અંગે જાણ થતા સ્થાનિક પોલીસની ટીમ પણ હોસ્પિટલ પહોંચી હતી અને અકસ્માતે મોતનો ગુનો નોંધી આગળની તપાસ હાથ ધરી હતી. પ્રાથમિક તપાસમાં અંકિતે બિલ્ડિંગના ચોથા માળેથી પડતું મૂકીને આપઘાત કર્યો હોવાનું સામે આવ્યું છે. આશાસ્પદ યુવક ગુમાવતા પરિવારમાં ગમગીની છવાઈ છે.
