વડાપ્રધાન નરેન્દ્ર મોદીએ ચંદ્રયાન-3ના સફળ પ્રક્ષેપણ પર દેશના વૈજ્ઞાનિકોને સલામ કરતા કહ્યું કે ચંદ્રયાન-3 એ ભારતની અવકાશ યાત્રામાં એક નવો અધ્યાય લખ્યો. આ નોંધપાત્ર સિદ્ધિ આપણા વૈજ્ઞાનિકોના અથાક સમર્પણનું પ્રમાણ છે.
વૈજ્ઞાનિકોની ભાવના અને પ્રતિભાને સલામ
પીએમ મોદીએ ઈસરોની સફળતા પર ટ્વીટ કર્યું અને કહ્યું- ‘ચંદ્રયાન-3 એ અવકાશ યાત્રામાં એક નવો અધ્યાય લખ્યો છે. તે દરેક ભારતીયના સપના અને મહત્વકાંક્ષાઓની ઊંચી ઉડાન છે. આ નોંધપાત્ર સિદ્ધિ આપણા વૈજ્ઞાનિકોના અથાક સમર્પણનું પ્રમાણ છે. હું તેમની ભાવના અને પ્રતિભાને સલામ કરું છું.’
24 થી 25 ઓગસ્ટની વચ્ચે કરશે ચંદ્ર પર લેન્ડિંગ
જણાવી દઈએ કે ઈસરોએ ચંદ્ર પર તેનું ત્રીજું મિશન ચંદ્રયાન-3 લોન્ચ કરી દીધું છે. ચંદ્રયાન-3 આજે બપોરે 2.35 કલાકે શ્રીહરિકોટાના સતીશ ધવન સ્પેસ સેન્ટરથી લોન્ચ કરવામાં આવ્યું છે. ચંદ્રયાન-3 આજથી બરાબર 41 દિવસ પછી 24 થી 25 ઓગસ્ટની વચ્ચે ચંદ્રની સપાટી પર ઉતરશે, એ પહેલા ચંદ્રયાન પૃથ્વીની ભ્રમણકક્ષામાં અને પછી ચંદ્રની ભ્રમણકક્ષામાં પરિભ્રમણ કરશે, એ પછી ચંદ્રની સપાટી પર લેન્ડિંગ કરશે.
