લોકસભાની ચૂંટણીની તૈયારીઓ જોરશોરથી શરૂ થઈ ગઈ છે. NDAની બેઠક શાસક ભારતીય જનતા પાર્ટી (BJP)ના નેતૃત્વમાં યોજાઈ, જેમાં 39 પક્ષોએ ભાગ લીધો. બેંગલુરુમાં વિપક્ષની બેઠક યોજાઈ અને 26 પક્ષોના આ ગઠબંધનને નવું નામ INDIA આપવામાં આવ્યું. આ બંને ગઠબંધન સિવાય પણ કેટલીક પાર્ટીઓ એવી હતી જેમનું અસ્તિત્વ અને વોટબેંક ઘણી મોટી છે પરંતુ તેમને કોઈપણ ગઠબંધન તરફથી આમંત્રણ મળ્યું નથી. તેમાં ઓડિશાના સીએમ નવીન પટનાયક, તેલંગાણાના સીએમ કેસીઆર, આંધ્રપ્રદેશના સીએમ જગન મોહન રેડ્ડી, યુપીના ભૂતપૂર્વ સીએમ માયાવતી અને હૈદરાબાદના સાંસદ અસદુદ્દીન ઓવૈસી જેવા મજબૂત નેતાઓનો સમાવેશ થાય છે.
થોડા મહિના પહેલા જ KCR જ વિપક્ષી પાર્ટીઓને એક કરવાનો પ્રયાસ કરી રહ્યા હતા. તેઓ ઘણા રાજ્યોમાં ગયા અને વિરોધ પક્ષોના નેતાઓને મળ્યા પણ હતા, પરંતુ અચાનક તેઓ શાંત પડી ગયા. એક સમયે કેસીઆર કહી રહ્યા હતા કે મોદીને હરાવવા માટે તમામ પક્ષોએ એક થવું જોઈએ અને તે તેના માટે ફંડિંગ કરશે. હવે સ્થિતિ એવી છે કે કેસીઆરને ન તો એનડીએમાં બોલાવવામાં આવ્યા અને ન તો વિપક્ષી ગઠબંધન માટે કેસીઆરને આમંત્રણ આપવામાં આવ્યું. બીજી ઘણી પાર્ટીઓની પણ આ જ હાલત છે. આમાં, ખાસ કરીને એવા પક્ષો છે જે કોંગ્રેસ સાથે સીધી સ્પર્ધામાં છે અથવા તેઓ ગઠબંધનના સહયોગી પક્ષ સાથે સીધી સ્પર્ધામાં છે.
યુપીમાં માયાવતીને ન મળ્યું આમંત્રણ
2019ની લોકસભા ચૂંટણીમાં બસપા અને સપા સાથે મળીને ચૂંટણી લડ્યા હતા. જેમાં માયાવતીની બસપાએ 10 સીટો જીતી હતી. જો કે, આ ગઠબંધન તૂટી ગયું અને બસપાએ 2022ની વિધાનસભા ચૂંટણીમાં એકલા હાથે ચૂંટણી લડી. પરિણામે, તે ઘટીને માત્ર એક બેઠક રહી હતી. માયાવતી પર સપાને હરાવવા માટે પોતાનો મત ભાજપમાં ટ્રાન્સફર કરવાનો આરોપ હતો. આ સિવાય એવું પણ જોવા મળ્યું છે કે માયાવતી ભાજપ કરતા સપા અને કોંગ્રેસ પર વધુ પ્રહાર કરે છે. વળી, સપા અને બસપા ફરી એકસાથે આવે તેવી શક્યતા ઓછી છે.
કદાચ આ જ કારણ હતું કે મહાગઠબંધનમાં સામેલ થવા માટે વિપક્ષ તરફથી માયાવતીને આમંત્રણ નહોતું મોકલવામાં આવ્યું. તેનું એક કારણ એ પણ હોઈ શકે છે કે જો માયાવતી આ ગઠબંધનમાં આવી હોત તો સપા સાથે સીટ વહેંચણીના મામલે વિવાદ થઈ શક્યો હોત. સપા પ્રમુખ અખિલેશ યાદવ કોંગ્રેસને વધુ સીટો આપવા માંગતા નથી, આવી સ્થિતિમાં જો બસપા પણ હોત તો સીટોની વહેંચણી પર જ મામલો અટકી ગયો હોત.
એકલા ચલોના માર્ગે છે જગન મોહન રેડ્ડી અને નવીન પટનાયક
ઓડિશામાં નવીન પટનાયકની પાર્ટી બીજેડીનો મુખ્ય વિરોધી કોંગ્રેસ છે. જગન મોહન રેડ્ડી પણ કોંગ્રેસ તરફથી જ પડકારનો સામનો કરી રહ્યા છે. આંધ્રપ્રદેશના પૂર્વ સીએમ ચંદ્રબાબુ નાયડુ પણ કોંગ્રેસ સાથે એટલા સહજ નથી. આવી સ્થિતિમાં આ ત્રણેય પક્ષોને કોંગ્રેસ ગઠબંધન તરફથી આમંત્રણ મળ્યું નથી. એવું કહેવામાં આવી રહ્યું છે કે નવીન પટનાયકને એનડીએ સાથે લાવવાના પ્રયાસો પણ કરવામાં આવ્યા હતા પરંતુ તેઓ કોઈપણ ગઠબંધન સાથે જવા માંગતા નથી.
AIMIM ચીફ અસદુદ્દીન ઓવૈસી તેલંગાણામાં KCRના ભાગીદાર છે. તેઓ બીજેપીના કટ્ટર ટીકાકાર હોવા ઉપરાંત કોંગ્રેસ, ટીએમસી અને સમાજવાદી પાર્ટી પર અવારનવાર હુમલા કરતા હોય છે. આ સિવાય તેમનું એમ પણ કહેવું છે કે આ પાર્ટીઓ તેમને અસ્પૃશ્ય માને છે, તેથી જ તેમને વિપક્ષની બેઠકમાં બોલાવવામાં આવતા નથી. અકાલી દળ પણ એક એવો પક્ષ છે જે ન તો કોંગ્રેસ સાથે છે અને ન તો ભાજપ સાથે. જો કે, આ તમામ પક્ષો પોતાના દમ પર મોટી ઉથલપાથલ કરવાની શક્તિ ધરાવે છે, તેથી જ 2024ની લોકસભા ચૂંટણીમાં તેમની પર સૌની નજર રહેશે.
આ પક્ષોની કેટલી છે તાકાત –
BSP – 10 લોકસભા સાંસદો
YSR કોંગ્રેસ – 22 લોકસભા સાંસદો
BJD – 12 લોકસભા સાંસદ
BRS – 9 લોકસભા સાંસદ
AIMIM – 2 લોકસભા સાંસદ
અકાલી દળ – 2 લોકસભા સાંસદ
TDP – 3 લોકસભા સાંસદો
