વડાપ્રધાન નરેન્દ્ર મોદીએ રવિવારે મન કી બાતના 103મા એપિસોડમાં દેશવાસીઓને સંબોધિત કર્યા હતા. આ દરમિયાન વડાપ્રધાન મોદીએ કહ્યું કે, ‘મને તાજેતરમાં હજ યાત્રાથી પરત ફરેલી મુસ્લિમ મહિલાઓના મોટી સંખ્યામાં પત્રો મળ્યા છે. આ મહિલાઓએ મેહરમ વગર હજ યાત્રા પૂર્ણ કરી હતી. તેમની સંખ્યા 50 કે 100 નહીં પરંતુ 4000 છે. આ એક મોટો ફેરફાર છે. અગાઉ મુસ્લિમ મહિલાઓને પુરૂષો વિના હજ યાત્રા પર જવાની પરવાનગી ન હતી. મેહરમ વિના હજ યાત્રા પર જતી મહિલાઓ માટે મહિલા સંયોજકોની નિયુક્તિ કરવા બદલ હું સાઉદી અરેબિયાની સરકારનો પણ આભાર માનું છું.
હજ નીતિમાં ફેરફાર
પીએમ મોદીએ કહ્યું કે, છેલ્લા કેટલાક વર્ષોમાં હજ પોલિસીમાં જે ફેરફારો કરવામાં આવ્યા છે તેની ખૂબ પ્રશંસા કરવામાં આવી રહી છે. અમારી મુસ્લિમ માતાઓ અને બહેનોએ મને આ વિશે ઘણું લખ્યું છે. હવે, વધુને વધુ લોકોને હજ પર જવાની તક મળી રહી છે. જે લોકો હજ યાત્રાથી પરત ફર્યા છે, ખાસ કરીને અમારી માતાઓ અને બહેનોએ પત્રો લખીને તેમના આશીર્વાદ આપ્યા છે, તે પોતે ખૂબ જ પ્રેરણાદાયક છે.
મેહરમ વગર હજ પર જતી મહિલાઓની સંખ્યામાં વધારો
ઇસ્લામમાં મેહરમ તે પુરુષ છે જે સ્ત્રીનો પતિ છે અથવા લોહીના સંબંધમાં છે. આ વખતે હજ યાત્રાએ એકલી જતી 4314 મહિલાઓએ અરજી કરી હતી. આઝાદી બાદ વર્ષ 2018માં પહેલીવાર ભારતમાં મેહરમની મજબૂરી દૂર કરવામાં આવી હતી. ત્યારથી, 3401 મહિલાઓએ પુરૂષ સંબંધીઓ અથવા મેહરમ વિના હજ કરી હતી. આ વખતે આ આંકડો ચાર હજારથી વધુ હતો, જે પોતાનામાં મોટી વાત છે. અલ્પસંખ્યક બાબતોના મંત્રાલયના જણાવ્યા અનુસાર, હજ નીતિ અનુસાર, 45 વર્ષથી વધુ ઉંમરની મહિલાઓ જેમની પાસે મેહરમ નથી તે ચાર કે તેથી વધુ મહિલાઓના સમૂહમાં હજ કરી શકે છે.
