ગુજરાત હાઈકોર્ટે શુક્રવારે દિલ્હીના મુખ્યમંત્રી અરવિંદ કેજરીવાલ અને તેમના પક્ષના સાથી સંજય સિંહ દ્વારા દાખલ કરવામાં આવેલી અરજીઓ પર તાકીદના ધોરણે સુનાવણી કરવાનો ઇનકાર કર્યો હતો.
AAPના બે નેતાઓનું પ્રતિનિધિત્વ કરવા દિલ્હીથી આવેલા વરિષ્ઠ વકીલ દ્વારા વારંવાર વિનંતીઓ કરવા છતાં, કોર્ટે કહ્યું કે તે પ્રાથમિકતાની સુનાવણી આપી શકતી નથી. મીડિયા અહેવાલ અનુસાર, ન્યાયાધીશ સમીર દવેએ કેજરીવાલ અને સિંઘ દ્વારા અપરાધિક માનહાનિના કેસમાં હાજર થવા માટે જારી કરાયેલા સમન્સને રદ કરવા માટે દાખલ કરવામાં આવેલી અરજીઓ સાંભળવાનો ઇનકાર કર્યો હતો.
અહેવાલ અનુસાર, ઉલ્લેખ દરમિયાન દિલ્હીના વરિષ્ઠ વકીલ રેબેકા જ્હોને સુનાવણી માટે સમય માંગ્યો હતો. જસ્ટિસ દવેએ કહ્યું કે, તેમની બેન્ચ લંચ પછી ઉપલબ્ધ ન હોવાથી અરજીઓ પર સુનાવણી કરવી શક્ય બનશે નહીં. જ્હોને દસ મિનિટની સુનાવણીની માગ કરતા કહ્યું કે, માનહાનિના કેસની સુનાવણી શનિવારે થવાની છે. જસ્ટિસ દવેએ વિનંતીને નકારી કાઢી હતી અને સુનાવણી 26 સપ્ટેમ્બર સુધી મુલતવી રાખી હતી.
પીએમ નરેન્દ્ર મોદીની શૈક્ષણિક ડિગ્રી સંબંધિત વિવાદને લઈને રાજ્ય સંચાલિત ગુજરાત યુનિવર્સિટી દ્વારા દાખલ કરવામાં આવેલા ફોજદારી માનહાનિ કેસમાં મેટ્રોપોલિટન મેજિસ્ટ્રેટ દ્વારા બંને AAP નેતાઓને સમન્સ પાઠવવામાં આવ્યા છે. કેજરીવાલ અને સંજય સિંહે સમન્સને સેશન્સ કોર્ટમાં પડકાર્યો હતો, જેને તાજેતરમાં ફગાવી દેવામાં આવ્યો હતો. ત્યારબાદ, તેઓએ રદ કરવા માટે હાઇકોર્ટનો સંપર્ક કર્યો હતો.
