ગીર સોમનાથ જિલ્લાના ઉનામાં ભડકાઉ ભાષણના કેસમાં જેલમાં ધકેલાયેલી કાજલ હિન્દુસ્તાનીએ ફરી લવ જેહાદ અને લેન્ડ જેહાદ સામે અવાજ ઉઠાવ્યો છે. કોર્ટમાંથી જામીન મળ્યા બાદ કાજલ હિન્દુસ્તાની જામનગરના કાલાવડ પહોંચતા તેમનું સ્વાગત કરવામાં આવ્યું. આ પ્રસંગે કાજલ હિન્દુસ્તાનીએ સરદાર પટેલ અને આંબેડકરની પ્રતિમાને પુષ્પાંજલિ અર્પણ કરી.
કાજલ હિન્દુસ્તાનીએ કહ્યું કે તેને કાયદામાં પૂરો વિશ્વાસ છે. આ જ કારણ છે કે પાંચ દિવસ જેલમાં રહ્યા બાદ આખરે તેને જામીન મળી ગયા. કાજલ હિન્દુસ્તાનીએ કહ્યું કે તે લવ જેહાદ, લેન્ડ જેહાદ સામેની લડાઈ ચાલુ રાખશે. એટલું જ નહીં, તે પોતાની રીતે લોકોને જાગૃત કરવા માટે હિંદુ સંગઠનો સાથે કામ કરવાનું પણ ચાલુ રાખશે.
પોલીસે કાજલ હિન્દુસ્તાની વિરુદ્ધ રામનવમી પર ઉનામાં તેના ઉશ્કેરણીજનક ભાષણ બદલ FIR નોંધી હતી. કોર્ટ દ્વારા જામીન અરજી નામંજૂર થતાં તેને જેલમાં મોકલી દેવામાં આવી હતી.
પ્રખ્યાત જમણેરી કાર્યકર્તા કાજલ હિન્દુસ્તાનીને સેશન્સ કોર્ટે 13 એપ્રિલે જામીન આપી દીધા. કાજલ હિન્દુસ્તાનીની ગુજરાતના ગીર સોમનાથ જિલ્લાના ઉના શહેરમાં કથિત દ્વેષપૂર્ણ ભાષણ બદલ ધરપકડ કરવામાં આવી હતી. ઉનાના એડિશનલ ડિસ્ટ્રિક્ટ એન્ડ સેશન્સ જજ રેખા આસોડિયાએ જામનગરની રહેવાસી કાજલ હિન્દુસ્તાનીને શરતી જામીન મંજૂર કર્યા છે, જેમાં ચાર્જશીટ દાખલ ન થાય ત્યાં સુધી દર મહિને બે વાર તેના નિવાસસ્થાન નજીકના પોલીસ સ્ટેશનમાં હાજર રહેવાનો સમાવેશ થાય છે. કોર્ટે એવી પણ શરત મૂકી છે કે સુનાવણીમાં હાજર રહેવા સિવાય, સુનાવણી પૂરી ન થાય ત્યાં સુધી તે ગીર સોમનાથ જિલ્લામાં પ્રવેશ કરશે નહીં.
કોર્ટે આરોપી પાસેથી બાંહેધરી પણ લીધી કે તેણી જામીન પર છૂટતી વખતે ફરિયાદી અથવા સાક્ષીઓને ડરાવી કે પ્રભાવિત કરશે નહીં. કોર્ટમાંથી જામીન મળ્યા બાદ, કાજલને ગુરુવારે સાંજે પડોશી જૂનાગઢ જિલ્લાની જેલમાંથી મુક્ત કરવામાં આવી હતી, ત્યારબાદ તે પોલીસ સુરક્ષા હેઠળ રોડ માર્ગે જામનગરમાં તેના ઘરે ગઈ હતી. રસ્તામાં કેટલીક મહિલાઓ અને સ્થાનિક લોકોએ કાજલના વાહન પર ફૂલોની વર્ષા કરી હતી. એટલું જ નહીં જામનગરમાં અનેક જગ્યાએ હિન્દુ સંગઠનોના કાર્યકરોએ ફટાકડા ફોડીને જામીન મળવાની ખુશી વ્યક્ત કરી હતી. કાજલ હિન્દુસ્તાનીની 9 એપ્રિલે ગીર સોમનાથ જિલ્લામાં રામ નવમીના અવસર પર ભડકાઉ ભાષણ કરવા બદલ ધરપકડ કરવામાં આવી હતી.
